矛盾對決博和

猪拉多纳

阿根廷以守代攻 巴西有前冇後

今屆世盃南美洲區外圍賽，阿根廷冇咗球王美斯帶領下，開局2戰只得1分，令球隊飽受壓力。禍不單行嘅係，阿根廷正面臨「傷鋒」困境，想反底一啲都唔容易。考慮到球隊再冇輸波失分本錢，聽朝佢哋主場同宿敵巴西合演超級打吡，目標隨時拎1分就算，不妨冷敲3.1倍和局。

（開賽時間：周五早上8:00）

過去有球迷認為美斯專注踢巴塞，返到國家隊就Hea踢，搞到阿根廷冇冠軍攞。但原來阿根廷冇咗球王即刻「降呢」，頭2輪外圍賽鬥厄瓜多爾同巴拉圭，拎得1分仲要全面啞火冇波入，證明阿根廷冇咗美斯真係唔得掂。
阿根廷兩戰零入球

更大鑊嘅係阿古路、泰維斯齊齊受傷，「潘帕斯雄鷹」焗用希古恩掛帥。雖然賽前隊友迪馬利亞話，今季喺拿玻里斬獲9個聯賽入球嘅希古恩表現唔差，之不過呢位射手近2年18次為國披甲，連同兩度攻破香港隊大門，埋單計只係入得5粒，好難叫捧場客安心啫。

雖然攻唔掂，好在阿根廷防守力仲keep到，過去1年佢哋喺世盃、美洲盃13次出擊，9次喺法定時間零封對手，證明由防中馬斯真蘭奴帶領嘅防線經得起考驗。況且家陣阿根廷冇資格冒險搶攻，若然今仗連1分都保唔住，將嚴重打擊球隊出線前景，隨時連主帥馬天奴被問責落台，所以話「潘帕斯雄鷹」今仗以1分為目標都不為過。
尼馬復出實被盯死

至於巴西亦唔係醒得去邊，外圍賽2戰取得1勝1負，再唔係昔日雄霸南美嘅無敵雄師。雖然王牌尼馬今仗復出，但佢肯定會成為眾矢之的，未必幫到太多，即使侯克、奧斯卡杜斯山度士等鋒將落場搏殺，但想攻破阿根廷嘅銅牆鐵壁唔係咁易。加上「森巴軍團」防線缺少堤亞高施華、馬昆奴斯哥利亞、馬些路坐鎮，一向以穩行先嘅主帥鄧加，亦未必敢去盡置對方於死地。再講，世盃外圍賽依家仲處於起步階段，未使去到生死相搏一刻，相信雙方唔介意和氣收場各取1分。