德爆逃兵潮 讓唔起荷蘭

猪拉多纳

6國腳疑似嚇親

巴黎恐襲陰霾籠罩全球，剛啱同死神擦身而過嘅德國國家隊，今晚會喺自己地頭同荷蘭拍跳，雖然德國足總強調唔會向恐怖主義行為屈服，落實今仗如期進行，但包括舒韋恩史迪加等6位國腳疑似嚇親退隊，實力受損之下未必砌得低荷蘭。「橙衣兵團」有射手巴斯杜斯當旺，今鋪受讓半一，1.85倍下盤博得過！

（無綫翡翠台及TVB13周三凌晨3:45直播）

德國喺上周六凌晨嘅熱身賽淨吞法國兩蛋，撞正巴黎法國國家球場外圍發生恐怖襲擊，搞到「日耳曼兵團」賽後要留喺更衣室幾粒鐘，回程計劃亦都改咗飛赴法蘭克福，然後再去今仗比賽地點漢諾威。一度有消息話今晚鬥荷蘭場波會取消，但德國足總表示唔會向恐怖主義低頭，宣布比賽如期上演。
紐亞 小豬齊退隊

之不過德國足總同時表示，陣中6位國腳包括隊長「小豬」舒韋恩史迪加、門將紐亞、守將謝路美保定、祖拿斯赫達、前鋒普多斯基同利萊辛尼都齊齊退隊，謝路美保定同祖拿斯赫達話有傷在身，利萊辛尼就要出戰U21賽事，咁其餘幾位呢？有消息話唔少國腳經歷法國一役後嚇破膽，唔排除係驚得滯至高掛免戰牌，可以預期德國今仗戰鬥力會大為削弱。
橙軍巴斯杜斯弗爆

荷蘭無緣歐國盃決賽周，落到場明顯冇乜包袱，上場熱身賽仲憑洛賓梅開二度勇挫威爾斯3:2添。雖然「小飛俠」同拜仁慕尼黑有協議在先，今仗唔會為荷蘭落場，但係昆斯普美斯、史奈達同韋拿杜姆今季喺所屬球會都有出色演出，最犀利係前鋒巴斯杜斯，呢位箭頭今季喺德甲已經有6球進帳，對威爾斯一戰仲攞到代表國家隊嘅首個「士哥」，有呢幾件中前場猛將衝鋒陷陣，要砌低天殘地缺嘅德國唔係天方夜譚。