洪禮賢講馬：季中相馬易睇錯

纯情小彩迷

　　今季賽事已進行了一半有多，來到季中的環境，無疑與季初時段不一樣，開季之初，馬匹質素就算唔夠，狀態嚟得快，仍然有贏馬本錢，一旦到了季中，純粹以勇字當頭，根本唔易逞強，一來，不論哪個班次，唔少具潛力之輩，相繼係時候抬頭﹔二來，好些馬在季初已進入狀態，跑得三幾個月，任憑練馬師功力有多高，要喼住狀態並唔容易，更何況，馬匹唔係機器，不會有用之不完的體能。

　　此外，季中相馬情況與季初又係唔同，如果持相同準則，隨時中招收場，始終開季之前經歷過一個暑假，唔理目前暑期相隔日子比前少，還是賽駒收咧一陣就復課，總之一般賽駒冇跑接近三個月，那份新鮮感的確存在，已經上晒火嘅馬，季初亮相一定較sharp，而普遍又唔會經過首仗之後便「銷聲匿跡」，所以，這類馬在臨場的觀感易察覺，之但係，跑得幾個回合，如該些馬匹體力未down，但由於漸漸跑到「滑晒牙」，臨場神色或已收斂，要辨清靚同唔靚，真係冇咁易。

　　就以剛仗「火箭動力」為例，記憶所及，佢在季初上名一役，臨場行圈好醒神，舉止亦充滿活力，但見佢剛賽亮相之時，未至於「死牯牯」，亦唔見引人注目，睇落好似瞓唔醒咁款，若果話洪某一個較主觀，當日幾位拍檔同樣有此睇法，當然，結果係畀隻馬呃咗（其實賽前有揀佢，唉﹗）。

卓爾非凡觀感一新

　　 至於另一個例子，譬如「卓爾非凡」，進度才剛起步，前仗轉馬房初出，亮相時毫不起眼，見到真係唔開胃，但跑落卻是另一回事，到了呢次，嘩﹗臨場行起上嚟步步是力，頭岳岳，個樣串串哄，最終表現比前更進。所以，每隻馬在不同時段也會有不同觀感，不可一概而論啊。