拜仁奧林和氣生財

猪拉多纳

默契波「夾」死阿仙奴

歐聯今晚戰火重燃，最矚目當然係F組拜仁主場迎戰奧林比亞高斯，雙方會否如坊間猜測踢場默契和波，將同組命懸一線嘅阿仙奴「夾」出局，提早1輪攜手出線？抑或拜仁拔刀相助贏波，令阿仙奴重現生機？備受全球「廠迷」關注。

阿仙奴隨住上仗作客慘敗畀拜仁1比5後，喺F組4戰僅得3分，畀頭兩位嘅拜仁同奧林比亞高斯甩開6分，只剩番兩輪比賽，主帥雲格想保住連續16屆帶兵工廠殺入16強嘅金漆招牌，難度極高。最重要係阿仙奴嘅出線命運，已經唔係掌握喺自己手上，假設佢哋今仗喺主場順利擊敗薩格勒布戴拿模，累積6分，但只要另邊廂拜仁主場對奧林比亞高斯，夾計打場默契和波，就可以同獲10分踢走阿仙奴，提早1輪攜手進身16強，因此阿仙奴出線形勢危危乎。

斯維深信拜仁主場對奧林比亞高斯，好大可能會踢默契和波，始終及早剷除阿仙奴呢粒眼中釘，對大家都有好處。雖然拜仁主帥哥迪奧拿口口聲聲話今仗唔會Hea踢，但上仗幾經辛苦擊敗史浩克04，《圖片報》畀大部分球員3至5分（1分最高），其中沙比阿朗素更獲得最低嘅5分，整體表現差強人意。奧林比亞高斯日前聯賽對彭拿典奈高斯，因賽前有球迷掟煙花而臨時取消，成班波抖到夠造訪安聯球場，有力全身而退，受讓必揀2.72倍讓球客勝，有信心不妨直取8.2倍和波。

（有線63台周三凌晨3時45分直播）
兵工廠自救博「大」霧

至於阿仙奴主場對薩格勒布戴拿模，兵工廠日前聯賽不但輸畀西布朗打擊士氣，兩大防中高基連同阿迪達更先後受傷，今仗上陣成疑，尤其高基連滿場飛嘅攔截補位，大大減輕防線壓力，冇咗佢助陣影響極大，加埋原有嘅阿歷士張伯倫、艾朗藍斯、韋碧克、禾確特、韋舒亞、路斯基等成籮「十字兵」，阿仙奴今仗就算有地利，唔係話想贏就一定贏到戴拿模，隨時求勝心切谷得太上，令後防錯漏百出而失波，斯維寧捧2倍入球大。

（有線61及201台周三凌晨3時45分直播）