榜首大戰 李城殲魔

猪拉多纳

華Dee爭破紀錄狂插迪基亞

英超榜首「藍紅大戰」勁有新鮮感，皆因「藍軍」並非曼城或車仔，而係「狐狸」李斯特城主場鬥「紅魔」曼聯！李城唔止聯賽高踞榜首，狀態火熱嘅前鋒占美華迪（華Dee）更以13球喺射手榜獨佔鰲頭，如果佢今仗可以再次攻破英超暫時失波最少嘅曼聯神龍迪基亞大門，就會打破昔日紅魔射手雲尼斯達萊創下嘅英超最長連續入球紀錄。加上曼聯正面對前鋒死火同傷兵滿營嘅問題，咁嘅環境作客讓波真係搵你要，一於捧李城讓球主勝。

（now 621周日凌晨1時30分直播）
超越雲佬還看今晚

李斯特城今季由「球隊醫生」雲尼亞里調教下，表現脫胎換骨，13場英超錄得8勝4和1負，水準穩定，絕非僥倖。其中射手占美華迪大爆發，更為「狐狸」增添神奇色彩，呢位28歲前鋒3年前仲踢緊地區球隊，年輕時生活貧窮，因返工廠賺錢，每日搬運大量重物，造成背傷，幾乎令球員生涯毀於一旦，估唔到依家可貴為英超射手榜一哥，而佢嘅「球迷奇遇記」仲未完，佢已連續10場聯賽有波入，追平「雲佬」03年嘅紀錄，球隊上下，以至全球各地球迷都熱切期待「華Dee」今晚可以改寫歷史。今仗對李斯特城及占美華迪而言，絕對係重要一戰，而佢唔係孤軍作戰，事關佢有今季已交出7入球6助攻亮麗數據嘅馬列斯喺中場支援，二人搭檔攻堅，堪稱英超最強之矛。
曼聯啞火傷兵滿營

至於暫列第2位嘅曼聯，雖說由迪基亞領軍嘅防線表現出色，失球數字暫為英超最低（9球）。可惜中前場攻擊球員個個忘帶射門鞋，近7場比賽有4場打和0比0，包括周中歐聯悶和燕豪芬，搞到出線現危機。「紅魔鬼」死火原因包括朗尼長期缺態、迪比冇料到，安東尼馬迪爾早前受傷後，發揮明顯受影響，領隊尹戈爾近期重用嘅連格又火喉未夠。最慘係傷兵問題嚴重，安達靴里拉、卡域克、菲爾鍾斯、路爾斯華倫西亞、勞基梳爾都缺陣，以緊絀人腳應付歐聯及聯賽雙戰線，實在吃不消，勢必喺呢場「矛盾大戰」中落於下風，仲要讓波梗係捧唔過啦！