(六)20 曼城vs修咸頓

猪拉多纳

施華復出曼城大舉出擊

連輸兩場嘅曼城今晚會主場迎戰「聖人」修咸頓，曼城呢排真係黑過墨斗，門神赫特同中堅文加拉都做埋十字軍，同隊長高柏尼、薩巴列達等排排坐做觀眾，後防大穿窿，好彩係中場發電機大衞施華有望趕及復出，火力得以加強。「藍月亮」過去四次主場對「聖人」，有三仗總入球達四球或以上，即使今場入球大細中位數開到2.5/3球，照捧大盤！

（now 621周六晚11時直播）

喺英超主場被利物浦大炒四個一皮、歐聯作客又不敵祖雲達斯0比1，曼城急需一場勝仗振奮士氣，今場對手係第八位嘅修咸頓，「藍月亮」對上三次對戰均贏波，當中兩次更分別大炒3比0同4比1。若然大衞施華今場傷愈復出，相信曼城攻力會大升呢，呢位廿九歲球星仍然係「藍月亮」進攻命脈，佢掌控住球隊進攻節奏，控波、扭門、派牌、射門瓣瓣掂，其他球星如阿古路、奇雲迪布尼、史達寧都冇佢咁全面。
赫特缺陣 聖人易搵食

不過曼城今場最大隱憂始終係防線，喺高柏尼、薩巴列達等防守大將缺陣下，防線好多時靠門將赫特頂住，但呢位門神喺上仗歐聯勇戰受傷，今場肯定缺陣，焗住要出後備門將韋利卡巴尼路，防線危危乎。修咸頓今場雖然有加斯安奴柏利停賽，前鋒積洛迪古斯更因傷要抖八周，但「聖人」勝在入球點分散，沙迪奧文尼、杜辛泰迪治、史提芬戴維斯均可分擔入球責任，大盤捧得過！