皇馬掃場「讓客」撳住搶

猪拉多纳

皇馬襲伊巴，全城恭迎C朗！「銀河艦隊」今晚喺西甲造訪伊巴，當地今日通街都係「金球獎」布置，恭候3屆金球獎得主C朗，未踢已經贏晒個勢，掂呀！況且皇馬為追趕巴塞隆拿不容再失，呢鋪必捧1.95倍「讓球客勝」。

（now632台周日晚11:00直播）
伊巴造勢助C朗爭金球

C朗係WIKO代言人，呢間智能手機廠同時亦係伊巴嘅贊助商，生招牌大駕光臨，WIKO決定搞大佢，今日喺伊巴市街邊嘅長櫈、交通燈、橙柱等掛滿金色氣球，並會喺伊巴主場擺放金球獎複製品畀Fans影相，恭迎C朗到訪。包括最貴價格嘅90歐元波飛，喺上周一已經全部賣晒，咁踴躍做乜，梗係睇C朗啦！反而伊巴今日嘅75周年會慶活動，似乎就冇乜人關注嘞。

C朗周中歐聯鬥薩克達省兩粒，掃走「國家打吡」輸鑊勁嘅烏氣，雖然中堅華拉尼同沙治奧拉莫斯都受傷缺陣，但以C朗同賓施馬為首嘅鋒線，要砌低伊巴依然綽綽有餘。伊巴今季只係輸過兩場，但兩場敗仗分別嚟自巴塞同馬體會，證明佢哋一撞硬嘢就冇符。

況且據德國轉會網站《Transfermarkt.de》估計，伊巴全隊身價只值4,000萬歐元，係全西甲入面最奀，一於博皇馬反彈大屠殺搵伊巴祭旗。