修咸頓半和好路

猪拉多纳

紅軍難贏賠率畀晒貼士

英聯盃8強重頭戲，修咸頓主場對利物浦，「聖人」最近兩戰全敗，紅軍則連贏3場，不過莊家都唔睇好紅軍今場可以順利贏波，馬會足智彩嘅客勝賠率有成2.55倍咁高。對紅軍冇信心，全因佢哋近期賽程頻密，球員開始出現腳仔軟情況，攻力更見疲弱，預料今場雙方會處於膠着狀態，難分勝負，半場和博得過。

（TVB 301周四凌晨3時45分直播）

利物浦領隊高普上任至今一共領軍10場波，戰績係6勝3和1負，其中作客完勝車路士同曼城，真係可以令到利迷High到過年，不過險勝魯賓卡山、波爾多、史雲斯，仲有不敵水晶宮，就睇得出紅軍打反擊就叻，對住專注防守嘅球隊冇乜計仔。利物浦10月尾喺聯賽主場對修咸頓，兩軍都冇乜到肉攻勢，半場打和0比0，最終1比1完場。今場英聯盃8強賽係一場過決勝負，修咸頓即使主場出戰都唔敢谷得太上，半場和有望再一次開出。
古天奴被圍難發威

紅軍另一隱憂係喺國際賽後賽程頻密，隔3至4日就有一場波，英超、歐霸、英聯盃輪住嚟，對球員體力已經係一大挑戰，更何況高普主張嘅係高強度壓迫性踢法，更易令球員體力透支，今場作出輪換係有需要嘅。雖然紅軍有史杜列治、佐敦軒達臣上場傷愈復出，「魔術師」菲臘比古天奴今場亦有望正選上陣，但前兩人抖咗太耐，狀態未起，古天奴亦好大機會畀對手重點防守，難有作為。

「聖人」上場聯賽不敵曼城1比3，中堅荷西方迪因傷退下火線，今場或由吉田麻也頂替其位置，對防守冇乜大影響。另外前鋒加斯安奴柏利亦坐完波監，今場有望正選登場，不過呢位意大利型仔鋒將過去3戰紅軍都零士哥，今場對住防守已大為改善嘅利物浦，睇怕都係冇運行。