祖記作客搵着素

猪拉多纳

密食4場追貼榜首

今輪意甲率先上演拉素主場鬥祖雲達斯之戰，祖記已經重拾衞冕霸氣，近4仗聯賽全勝，加上已提早取得歐聯16強席位，未來日子可以專注踢好意甲，力爭盡快收復失地，重返爭標行列，搶分決心肯定強。拉素跌晒Watt，近5場聯賽1和4負，今場受讓都冇着數，必捧當頭起嘅祖雲達斯客W。

（TVB301周六凌晨3時45分直播）

祖雲達斯季初一度嚴重失準，但呢支意甲4連冠始終有質素，經過調整之後，近4場聯賽贏晒，追到僅落後榜首拿玻里7分，重燃爭標希望。球隊已打番起信心同士氣，應會愈踢愈順。另一個有利因素係祖記上輪歐聯分組賽擊敗曼城後，提早取得出線權，下周中打和西維爾，更可穩坐小組首名，可以話冇晒後顧之憂，可盡情強攻拉素。
拉素失魂落魄等劏

雖然祖雲達斯中場主力保羅普巴停賽，慶幸其他球員狀態大勇，射手文迪蘇傑近4仗轟入3球，勢必令拉素難以招架。事實上，拉素陷入低潮，近5仗聯賽錄得1和4負劣績，同埋佢哋近8次對祖雲達斯，僅得2和6負，完全被對手食住，難免削弱球員信心，睇怕難逃再敗厄運。