惡客慕遜加柏唔赦曼城

猪拉多纳

打破拜仁不敗金身

曼城今晚喺歐聯D組出擊，主場恭候慕遜加柏，睇落係「藍月亮」秤先，實情佢哋家陣傷兵滿營，係咪仲有鬥心去爭小組首名出線都成問題。慕遜加柏氣勢如虹，受讓半一仲抵玩，撐2.06倍下盤。（有線64及203周三凌晨3:45直播）

已經篤定躋身歐聯16強嘅曼城，今仗要全取3分，再望同組「一哥」祖雲達斯輸畀西維爾，先可以獲小組首名。之但係曼城主帥比歷連尼賽前話，就算小組首名去到16強都唔一定易踢，似乎鋪定路交行貨喎！
曼城出咗線無謂博

又難怪嘅，「藍月亮」家陣傷兵滿營，除咗隊長高柏尼、右閘薩巴列達、中場耶耶托尼同前鋒阿古路之外，就連悍將費蘭甸奴都加入埋十字軍行列。既然隊波都出咗線咯，比帥都無謂咁搏吖，留力聯賽仲實際。
慕遜加柏12場不敗

對家慕遜就唔同嘞，家吓仲要為歐霸盃入場券努力，佢哋自從改由舒希拔領軍之後，表現脫胎換骨，最近12場波未輸過，啱啱仲喺德甲打破拜仁慕尼黑嘅不敗金身添，個勢猛成咁，去到氣勢回落兼且戰意成疑嘅曼城地頭，絕對有力保住不敗。