尼馬練波受傷或避戰 世冠盃失色

猪拉多纳

每年1度嘅世界冠軍球會盃今晚喺日本橫濱開波，7隊分別來自6大洲，包括巴塞隆拿、河床、FC廣州（廣州恒大淘寶）、馬贊比、CF阿美利加、奧克蘭及廣島三箭爭逐。不過，巴塞球星尼馬前晚備戰歐聯操練時受傷，可能缺席今屆世冠盃，如果屬實，難免令賽事失色。

尼馬剛當選西甲11月最佳球員，成為自13/14年球季以來，首位獲此殊榮嘅巴塞球員。可惜呢位巴西國腳操練時，拉傷大腿肌肉，未知要抖幾耐，唔排除無緣參加下周四巴塞首場世冠盃賽事。球迷失望之餘，亦可能削弱巴塞爭標機會。
今日揭幕　三箭好「細」界

今日揭幕戰，廣島三箭對大洋洲冠軍球會奧克蘭，三箭上周六奪得日職總冠軍，因此可代表主辦國日本出戰。今次係三箭第2次參加世冠盃，對上1次係2012年，當年佢哋喺揭幕戰以1比0擊敗奧克蘭。事實上，日本球隊對上3次參加世冠盃，首場比賽都係小勝開細盤，有路可捉。

新西蘭球隊奧克蘭第7次現身世冠盃，上屆採取主守踢法同列強周旋，爆冷成為季軍，期間4戰全開細。奧克蘭戰術奏效，預料會繼續以穩定突擊踢法應戰。加上今場屬於淘汰賽，一戰定生死，雙方都唔會冒進，首選入球細。

（有線61、201台周四晚6時45分直播）