頹爆史特加難敵緬恩斯

猪拉多纳

所謂「工欲善其事，必先利其器」，但如果「工者」質素唔掂，有利器都冇用。好似史特加前鋒迪姆華拿，雖然今季着住美斯專屬波砵征戰球場，不過隊波仲依然喺降班區掙扎。今晚佢哋作客鬥緬恩斯，就算受讓平半都要唔過，撐1.81倍上盤。

（now670台、有線61及201周六凌晨3:30直播）
華拿着美斯戰靴照啞火

今年6月adidas為美斯推出球王專屬系列「Messi 15.1」波砵，其後佢哋揀咗10位新星有得穿上呢對球王戰靴落場搏殺，年僅19歲嘅史特加前鋒迪姆華拿就係其中之一。之不過佢就算有「球王波砵加乘」，今仗睇怕亦搶分無望，皆因呢班波防守太差，15場聯賽失36球，作客成績同時係德甲最曳，就連迪姆華拿本人都陷入球荒，好難搞喎。

緬恩斯就唔同嘞，佢哋近況回勇，近4仗錄得3勝1和，而且向來喺主場食住對手，5鬥史特加取得4勝1和佳績，今仗仲有狀態弗爆嘅前鋒武藤嘉紀、中場查路森巴利奧坐鎮，近4戰不勝嘅史特加都好難全身而退喇！