MSN傷剩阿蘇巴塞捱細界

猪拉多纳

今晚西甲早場，巴塞隆拿主場對拉科魯尼亞，巴塞踢埋今仗就會直飛日本出戰世冠盃，行程非常緊密，偏偏唔好彩遇着尼馬受傷缺陣，加上美斯出現肌肉疲勞問題，今仗或有顧忌影響發揮，「MSN」鋒線靠蘇亞雷斯獨挑大樑。拉科魯尼亞今季靜靜起革命，已進身前六位，防線頂得兩嘴，相信即使落敗亦唔輸得多，Mic少捧入球細。

（now 632周六晚11時直播）

巴塞上仗歐聯例行公事對利華古遜，竟然搞到「焦頭爛額」；先係賽前尼馬操練受傷需抖一星期，更重要係美斯比賽途中出現肌肉疲勞問題，幾次彎低幫自己按摩。由於佢剛復出冇耐，教練安歷基肯定錫住佢，以免呢位球王再次受傷。

事實上，巴塞近期賽程非常緊密，除咗周中歐聯及今場西甲之外，下周四將出戰世冠盃四強，跟住三日後又要踢決賽或季軍戰，加上千里迢迢飛去日本，來回長途機程都好難捱。安歷基唔敢要求球員搏得太盡，否則傷兵問題惡化，影響下半季爭標就得不償失，預料巴塞今仗只求攞三分，應該唔會大炒對手。
拉科硬淨唔易啃

拉科魯尼亞上季季尾由名宿域陀接手執教，唔止護級成功，今季演出更脫胎換骨進佔前列，對住三支歐聯分子華倫西亞、馬體會及西維爾都奮戰打成1比1，表現非常硬淨。拉科近三次作客巴塞，有兩次不敗而回，防線發揮唔到你唔服，睇嚟巴塞今仗要入波並唔容易，吼入球細啱數。