多蒙特遇私房菜

猪拉多纳

接連做老二 爭盃唔會hea

德國盃第3圈賽事，捧盃熱門多蒙特作客奧格斯堡。「蜜蜂兵團」多蒙特連續兩屆屈居德國盃亞軍，谷埋成肚氣，令球隊更加渴望奪取呢項錦標，勢必場場去盡打真軍。以多蒙特過去3次作客奧格斯堡，全勝兼合共攻入10球嘅靚績，可望再次輕取對手，捧2.03倍嘅「讓球客勝」。

（TVB 13周四凌晨3時30分直播）

多蒙特自2012年捧走德國盃後，對上2屆都打入決賽，可惜分別不敵拜仁慕尼黑及禾夫斯堡屈居亞軍，球隊上下自然對德國盃饑渴感十足。事實上「蜜蜂兵團」非常重視呢個「盃仔」，唔會求其hea踢，佢哋今屆首2圈對弱隊都冇留手，包括上圈7比1大炒乙組仔柏達邦，相信今仗亦會派強陣出擊，作客打沉奧格斯堡。
奧格斯堡兵疲兼殘陣等劏

奧格斯堡現時喺德甲排尾6，漸見護級壓力，加上球隊今屆仲要分身歐霸盃，令球員疲於奔命，今仗係奧軍6日內第3場硬仗，加上陣中三線都有主力受傷，中堅布歷卡、中場華拿及前鋒桑恩柏加今仗無緣披甲，令兵源有限嘅奧格斯堡更難回氣，主場迎戰強敵都係凶多吉少。

另一場德國盃，紐倫堡主場對哈化柏林，乙組仔紐倫堡近況弗爆4連勝，全部半場已領先，踢法非常搶韁，愈踢愈心雄，越級挑戰都唔怕哈化柏林。哈化今季表現令人驚喜，近5仗4勝已升上德甲第3位，勢必乘勝追擊，有望上演入球騷，捧大盤。

（TVB 01周四凌晨2時直播）