日中交鋒廣州搶W如箭在弦

猪拉多纳

世冠盃季軍戰，東道主廣島三箭迎戰ＦＣ廣州（廣州恒大淘寶），中超富豪球會ＦＣ廣州奉行「金錢足球」，最緊要威，特別係對住日本球隊，加上要為受重傷嘅鄒正而戰，更加唔衰得，勢必當爭冠軍咁踢。廣島三箭經過連場激戰，體力輸蝕，傷停問題亦嚴重，抵擋唔住人強馬壯嘅ＦＣ廣州，客勝可捧。

（有線61及201台周日下午3時直播）
丹尼爾阿蘇祝福鄒正

ＦＣ廣州4強0比3不敵巴塞隆拿，皆因對手太強，實屬非戰之罪，最唔好彩係後衞鄒正被丹尼爾踢傷，估計有排抖。呢位巴西國腳都感到內疚，喺社交網發帖祝福鄒正早日康復，蘇亞雷斯更送上親筆簽名波衫畀鄒正，以示支持。連對手都不遺餘力為鄒正打氣，相信一眾隊友今仗應會落力作戰，贏番個季軍。ＦＣ廣州幾位巴西球員艾傑臣、列卡度高拉特、荷西保連奴都有質素，艾傑臣上仗更幾乎頂破巴塞大門，廣島三箭未必招架得住呢班森巴兵。
三箭傷疲交併惡唔出樣

廣島三箭月初捧完日職冠軍後，匆忙出戰世冠盃，並需由資格賽踢起，換言之比ＦＣ廣州踢多一場。今仗有後衞千葉和彥停賽，另外兩位守將川崎裕大、吉野恭平，中場柴崎晃誠、野津田岳人全部養傷，疲兵鬥唔過ＦＣ廣州，捧1.92倍客勝！