盧卡古士哥斷纜拖肥有難

猪拉多纳

愛華頓今晚迎史篤城，兩隊喺拆禮物日齊齊贏波而回，不過「拖肥糖」就贏得險好多，作客紐卡素靠湯卡華利喺補時最後1分鐘絕殺成功，贏對手1比0，之前連續7場聯賽入波嘅「小魔獸」盧卡古終於斷纜。愛華頓搏到最後階段先贏波，反觀史篤城上場對曼聯以2比0輕鬆取勝，一班球員嘅體力唔需要Chur到盡，今場作客愛華頓冇咁易輸，受讓半一捧下盤喇！

（now 623周一晚11時直播）

趁住占美華迪同馬列斯冇波入，已經取得13個聯賽入球嘅盧卡古對紐卡素又未能把握機會，射手榜上未能追近呢對李斯特城孖寶。「小魔獸」之前喺聯賽連續7場有「士哥」，計埋英聯盃一戰更係連續8場入波，狀態弗到漏。不過斷纜之後，今場對手仲要係防守不俗嘅史篤城，睇怕「小魔獸」都係難以發威。
史篤城作客好守得

史篤城近7作客有6場係保持清白身，加上對賽往績唔輸蝕畀愛華頓，對上3次聯賽對「拖肥糖」錄得2勝1和，計埋今季季前嘅英超亞洲挑戰盃，最近4次碰頭史篤城喺法定時間都未輸過，今場竟然有得受讓半一咁筍，梗係要捧下盤喇！