韋斯咸紅軍細均力敵

猪拉多纳

悶兵遇上海鮮波

新年英超首戰，韋斯咸主場對利物浦，「紅軍」由高普執教之後，仍然保持「海鮮波」本色，遇強愈強，但鬥弱隊時，卻佔唔到上風，加上攻力亦麻麻，恐怕好難喺韋斯咸身上佔到甜頭。當然「錘仔幫」亦唔係叻，但勝在夠韌力，近6仗獲得1勝5和，想贏佢哋並非易事。加上雙方經過聖誕快車，難免有疲態而力不從心，預料今仗會處於拉鋸，最好揀入球細。

（now 621周六晚8時45分直播）

利物浦由高普接手後，「神經刀」本質不變，可以擊敗車路士、大炒曼城，以及早前力挫當時榜首隊伍李斯特城，但對住紐卡素、西布朗、屈福特都贏唔到，上仗亦僅小勝尾二球隊新特蘭1比0。因此，即使今仗對手韋斯咸實力一般，但「紅軍」反而有失分危機。事實上，利物浦目前受傷兵問題困擾，前鋒奧歷治、丹尼艾格斯、中場占士米拿、後衞史卡迪爾都缺陣。隊長佐敦軒達臣亦有傷在身，上陣成疑。
利物浦靠賓迪基好單調

雖然史杜列治可望復出，但呢位「玻璃腳」近年抖多過踢，就算上陣，恐怕狀態亦不足，唔好期望佢可以作出太大貢獻。「紅軍」今仗繼續靠賓迪基衝鋒陷陣，以佢嘅力量型踢法搵食，進攻難免單調。

至於韋斯咸上仗反勝修咸頓，總算結束連續8場不勝頹勢，但能否乘勝追擊，始終令人懷疑，皆因「錘仔幫」攻力好弱，近5仗有3仗同對手互交白卷，即使對包尾嘅阿士東維拉，亦只能打和1比1。兩位前鋒迪亞法沙高、域陀摩西斯養傷，想攻破「紅軍」大門談何容易，揀入球細為妙。