水晶宮+1翻叮車仔

猪拉多纳

英超聖誕新年快車最後一輪，車路士將作客水晶宮，車仔看守領隊希丁克帶隊兩場仲未開齋，一班球星表現依然冇改善，今場讓波制唔過囉！水晶宮近6戰不敗，球隊首循環作客擊敗車仔2比1，今場返主場作賽，隨時雙殺車仔都唔定，科娜捧1.78倍嘅讓球主勝！

（now 621周日晚9時30分直播）

車仔球星成功「逼走」莫連奴後，諗住佢哋會有脫胎換骨嘅表現，點知贏完新特蘭一場後又打回原形，希丁克接手後對住屈福特同曼聯都只係和波，其中上場面對頹爆嘅「紅魔鬼」，車仔嘅演出甚至不及對方，唔係門神泰拔高圖爾斯力挽狂瀾，車仔輸埋都似。

車仔今場有迪亞高哥斯達刑滿復出，呢位鋒霸至今只係入得5個聯賽入球，同上季表現相比天與地，賽前希丁克就幫佢減壓，話「迪哥」入唔到波唔可以賴晒佢一個，中場亦有責任，好似夏薩達、奧斯卡杜斯山度士、柏度洛迪古斯等，今季嘅入波同助攻數字都勁少。

雖然希丁克冇講錯，不過「迪哥」亦好有問題，佢踢波太茅，好自然成為球壇公敵，每一隊嘅防守球員都會特別落力守死佢，所以入唔到波都係迪哥自己攞嚟嘅。
主帥柏杜劏車專家

能夠帶領水晶宮今季作客先後擊敗車路士同利物浦、依家排喺聯賽榜第5位，領隊柏杜絕對係有料到，最近甚至有傳皇馬想搵佢嚟頂賓尼迪斯添！柏杜之前執教紐卡素，就試過喺主場連續3次擊敗車仔，如果今場帶領水晶宮贏埋，就會第4次主場KO車仔嘞！水晶宮近況不俗，近6場取得3勝3和成績，就算今場有中場卡比耶坐波監、即使今場贏唔到，至少都可以保住不敗啦，主場受讓值捧！