希杭基達菲博和波

猪拉多纳

下游對壘水鬥水

今晚西甲得場獨腳戲，由兩支中下游球隊對決，希杭主場對基達菲。基達菲雖然近來狀況唔係差，不過作客始終係球隊一大死穴，相反希杭呢鋪有2大守將復出，相信有助鞏固防線，止血搶分。橫睇掂睇雙方都難言取勝，不妨冷敲3倍和局。

（now632台周二凌晨3:30直播）

講狀態，希杭呢排真係曳到冇眼睇，最近8場比賽輸咗6場，搞到隊波嘅信心同士氣都跌至谷底。好在佢哋賽前總算收到好消息，2大守將比拿度辛尼加、路爾斯靴南迪斯刑滿復出，防線齊番人有力減少失球數字。
冇態希杭兩守將復出

何況呢班波主場成績唔算曳，近5仗主場出擊只錄得1場敗仗，表現都有啲保證。事實上，今次係佢哋喺2016年首次喺鄉親父老面前出戰，相信佢哋都唔想搞衰台戲，主場第一炮就輸波咁失威，一眾球員呢鋪肯定會打醒12分精神迎戰，務求至少搶番分終止聯賽2連敗。
有態基達菲作客腳軟

對手基達菲狀態係就係唔差，連續4場比賽都保持不敗添，聽落幾有吸引力。但至弊佢哋硬係解決唔到每逢作客例必腳軟嘅問題，今季9次客途出擊全部未贏過，當中亦只有1仗可以保住清白身添。加上中場拿菲達，艾華路美特蘭一停一傷，基達菲想攞到今季首場作客勝仗怕且未係時候。既然兩軍同樣冇必勝把握，各得1分應該都係合理戰果。