利物浦坐困愁城

猪拉多纳

傷疲嚴重 高普冇計

英格蘭聯賽盃4強首回合大戰，史篤城主場硬撼利物浦，紅軍近期海鮮味濃，取得2連勝後，上周六英超作客韋斯咸又輸波，激到領隊高普紮紮跳，直言「我是憤怒。」其實紅軍依家傷兵問題嚴重，高普焗住要出同一班人，經過聖誕新年快車連場硬戰後，球員身心俱疲，今場係球隊「4連客」嘅第3站，要反彈贏波好難，熱捧讓球主勝！

（TVB 302周三凌晨4時直播）

不敵韋斯咸0比2後，高普鬧爆紅軍球員冇全力以赴作賽；的確班兵冇火冇鬥志係事實，見到佢哋行行企企好似一盤散沙，失波後即刻頹咗落嚟，心態好有問題。不過從球員角度睇，亦有部分原因係體力問題，利物浦由Boxing Day開始平均3日就踢1仗，除夕作客惡鬥新特蘭，之後要南下作客韋斯咸，賽程緊密真係好攞命。
連續第三場作客冇兵輪換

最弊仲係高普冇得輪換，大軍傷兵名單水蛇春咁長，長期十字軍有丹尼艾格斯同祖高美斯，前鋒奧歷治、中堅史卡迪爾要抖到下個月先復出，一直受腳跟傷患困擾嘅佐敦軒達臣今場或繼續缺陣，「玻璃腳」史杜列治則可能要操多排先復出，搞到高普用嚟用去都係賓迪基、菲臘比古天奴、羅拔圖法明奴呢班人，即使佢哋冇態都焗住要出，結果愈踢愈頹。

其中王牌古天奴自上月中傷愈復出後，狀態一直低沉；前鋒賓迪基更曳，雖然對住李斯特城同新特蘭都係靠佢攻入致勝一球，但同時兩場都有錯失單刀黃金機會，搞到信心盡失。呢位大舊前鋒本身已經速度慢，最近連高波都頂唔到，加上一班中場亦冇好好支援佢，今場仲要對住史篤城兩位高大又硬淨嘅中堅梳爾哥斯同禾爾舒捷特，賓迪基肯定冇啖好食。
史篤城主場好硬淨

雖然英聯盃4強賽制係如果兩回合計雙方打和，就要加時分勝負，加時階段先會計作客入球優惠，但史篤城今場都要做好防守先保不敗，否則輸波嘅話，次回合作客晏菲路就好難翻盤。史篤城主場硬淨，近5主場有4仗加保不失，今場受讓值捧，細盤都可以玩埋呀！