埃克塞特冇瓣掂 紅軍客客撳住搶

猪拉多纳

講到呢期邊隊踢得最密，相信非利物浦莫屬，佢哋剛剛喺英格蘭聯賽盃砌低史篤城後，今晚又要出戰英格蘭足總盃第3圈賽事作客埃克塞特。雖然紅軍呢排傷兵多，好在今仗對手埃克塞特狀態差到極，相信紅軍會舞到對手陀陀擰之餘，亦會盡早奠定勝局，畀班主力抖吓，1.85倍客客捧得過。

（開賽時間：周六凌晨3:55）

利物浦上場英聯盃以1:0打敗史篤城，不過中場菲臘比古天奴、中堅洛夫雲受傷，加上前鋒奧歷治、中場佐敦軒達臣等十字軍，人腳稍為緊張。新特蘭領隊艾拿戴斯就乘機抽水，寸高普低估咗英超嘅節奏，要求球員全場壓迫，結果搞到紅軍出現傷兵潮。
拉爾拉拿力撐高普

之不過中場拉爾拉拿就反駁話，唔可以將傷兵問題歸咎於高普：「球隊呢期賽程密集，喺每場比賽之間主要係做恢復性訓練，有時受傷只係咁唔好彩行緊衰運啫。」睇得出球員之間依然相信高普嘅戰術同訓練內容，軍心未有受動搖打擊。

事實上紅軍呢排成績的確有所好轉，近4戰贏咗3場，其中3次保持清白身，表現依然信得過。預料上仗後備上陣嘅射手賓迪基、中場占士米拿今仗會重返正選。睇番利物浦嚟緊將會惡鬥阿仙奴同曼聯，相信高普極唔想今仗耗力太多，一定要求眾將盡快確立領先優勢解決對手。
埃克塞特主場唔掂

至於身為乙組嘅埃克塞特，本身人腳已經輸蝕，只係得番主場之利同自身狀態可以抗衡紅軍，偏偏埃克塞特呢兩樣嘢都冇埋。呢班波最近狀態差到嘔，連續4場輸波之餘，場場至少畀對手射入2球，另外主場成績亦未見突出，近7次主場出擊只係贏得1場。無論人腳、地利定狀態瓣瓣輸晒，睇怕呢鋪未返更衣室之前就已經舉白旗投降都似。