易帥增兵漢諾威唔赦哈化

猪拉多纳

雖然今晚賽事唔多，但阿King睇中喺土耳其舉行嘅熱身賽上演「德甲內訌」，由前列分子哈化柏林對住尾二嘅漢諾威，兩隊放聖誕新年假開操冇耐，但漢諾威有名帥舒哈夫中途接手，並簽入數位中前場猛將，預計鬥心會更勝哈化，揀漢諾威讓球勝。

（有線64及203台周一晚11時30分直播）

由於德甲要到月尾先至重開，好多球隊都選擇赴外地集訓，並參與一系列熱身賽寓賽於操，哈化同漢諾威就係例子之一。查實兩軍都係啱啱開操，而且同樣傷兵成籮，不過漢諾威勝在請到名帥舒哈夫出山，代替早前請辭嘅方錫克執教，相信可憑經驗激勵眾將士氣。

同時，漢諾威趁住轉會窗重開，簽入賀芬咸前鋒施沙拉爾、大阪櫻花隊長山口螢同史卓加斯特中場艾華科森，對提升攻力大有幫助，加上新帥上任，眾將都想藉此爭取表現，以佢哋近4次鬥哈化僅1敗嘅往績，兼且有得受讓咁筍，讓球客勝乃不二之選。
法乙梅斯主場搶胡

至於法乙梅斯主場對索察，梅斯歇冬斯間搵來甚有聲望嘅新帥軒斯治貝加接手，主場出擊有力打響頭炮，小讓平半揀上盤。最後葡超費利拿主場對塞圖巴爾，費利拿前鋒般奴摩里拿連續兩場聯賽有士哥勁弗，不過上仗慘吞六蛋嘅塞圖巴爾，近三作客取得全勝，預計今仗係鬥攻格局，捧大更佳。