「太極虎」晒冷 砌烏茲別克

猪拉多纳

U23亞洲盃C組，南韓U23迎戰烏茲別克U23，南韓今屆精銳盡出，包括徵召效力德甲勁旅利華古遜前鋒柳承佑。呢位「新孫興民」踢U23亞洲盃根本超晒班，以土炮參賽嘅烏茲別克U23睇怕招架唔住，捧南韓U23主Ｗ。

（周四凌晨零時30分開賽）

南韓U23係上屆唯一打入4強嘅東亞球隊，可見「太極虎」青訓一直做得相當出色。事實上，南韓今次大軍名單有多位到海外搵食嘅球員，最具名氣必定係柳承佑。佢喺2013年世青盃已打出名堂，該屆有兩球進帳，好快就被利華古遜簽下。雖然上陣機會唔多，但話晒去德甲浸過「鹹水」，經驗及見識都遠勝同輩球員。另一位前鋒黃喜燦效力奧地利勁旅薩爾斯堡，仲有3位中後場球員喺日本搵食，三線實力有級數。烏茲別克U23上屆分組賽出局，球員質素有限，實在唔可以同南韓相提並論。
伊拉克全力數也門

同組伊拉克U23對也門U23，伊拉克係上屆冠軍，當力爭衞冕。19歲前鋒卡里姆效力瑞士超球隊草蜢，前途備受睇好，且看今場可以入幾多粒。也門足球水平一向低微，今仗好大機會被對手大炒攞彩。

（周三晚9時30分開賽）