勝利主場夠惡 天羅地網捉獅吼

猪拉多纳

今日晏晝澳職大戰，墨爾本勝利主場硬撼榜首嘅布里斯班獅吼。由於U23亞洲盃近日開打，兩軍都有球員代表澳洲U23而缺陣今場波，不過就以獅吼所受嘅影響較大，尤其少咗一對主力箭頭占美麥卡倫同班頓波里路，攻力即刻大減。勝利近4次對獅吼贏晒，今場小讓平半，上盤捧得過！

（有線64及203台周五下午4時40分直播）

占美麥卡倫同班頓波里路今季分別為獅吼喺聯賽射入7球同5球，係球隊入波最多嘅兩位球員，對獅吼嘅重要性不言而喻。獅吼冇咗呢對90後孖寶，影響馬上浮現，上仗作客威靈頓鳳凰悶和0比0，係球隊近9場以嚟首次冇波入。
近4次對陣勝利贏晒

排第5位嘅勝利落後緊獅吼7分，今場要收窄分差非勝不可，球隊睇落近況麻麻，近7場僅得1勝，但要留意嘅係，當中有6場係作客。呢隊波係地頭蟲，主場威力強勁，近7仗主場錄得6勝，加上對賽往績佔優，近4次對獅吼全勝，今場上盤值博。

勝利上仗作客中岸水手，竟然喺落後3球嘅情況下，下半場射入3球奇迹逼和，王牌鋒將貝利沙梅開二度，包括喺補時92分鐘轟入逼和嘅入球，肯定有助振奮球隊士氣。勝利今場亦有前鋒干洛皮恩、後衞加利富高、史葛加路維等人參戰U23亞洲盃，不過佢哋並非一線主力，整體實力並冇太大削弱，有力喺主場贏波，小讓平半必揀上盤。