亨克追前6掃雷冇留手

猪拉多纳

比甲歇冬後重開，頭炮暫排聯賽榜第7嘅亨克主場迎戰第5嘅華雷根，兩軍正力爭爭標組季後賽席位。亨克去年底成績下滑，源於鋒力不足，歇冬期作針對性增兵，中前場實力提升，有力擊退作客不濟嘅華雷根，黑柴撐1.7倍主勝。

（周六凌晨3時30分開賽）
華雷根作客腳軟

比甲常規賽只剩餘9輪賽事，列強都為前6名爭標組季後賽席位展開衝刺，前列4強真特，安德列治，布魯日同奧斯坦德打入前6呼聲高唱入雲，但第5至9位球隊目前差距只有6分，餘下兩席爭標組位置肯定爭崩頭，亨克目前落後華雷根5分，今仗不容有失。

亨克今季開季表現一直處於強勢，不過去年十月底主場遭弱旅梅斯干大炒4蛋，即陷入信心危機；歇冬前9場聯賽僅得兩勝，主要問題係鋒力不濟，雖然曾効力德甲慕遜加柏嘅射手迪甘馬高有質素，但佢已經33歲，好難長期保持高水準，球隊其餘前鋒質庸態沉，中場創造力亦嫌不足，搞到踢咗21輪聯賽僅入23球，鋒力之弱排比甲尾三。好在佢哋歇冬期作針對性增兵，由薩克達借得烏克蘭中場指揮官馬利路夫斯基，亦由彭拿典奈高斯重金買入希臘國腳前鋒卡里列斯（Nikos Karelis），中前場實力預期會大幅提升。

華雷根今季季前大換血後，成績確比之前理想，中場卡耶更係比甲助攻王，不過佢哋一向靠主場搵食，今季12場作客聯賽只得3勝，面對志在必得嘅亨克睇低一線。