勝利獅吼Goal手「大」比併

猪拉多纳

澳職今季競爭相當激烈，衞冕嘅墨爾本勝利雖然排第5位，但同「一哥」布里斯班獅吼只不過相差7分，今日勝利主場迎戰獅吼絕對係重量級好戲！近況麻麻嘅勝利上仗重現霸氣，射手貝利沙狀態回勇，獅吼亦有星級前鋒桑蘇拿辛奴急需用表現證明自己，今仗大有機會用進攻決勝負，1.7倍入球大好路。

（有線64及203周五下午4:40直播）
勝利貝利沙重拾射門鞋

墨爾本勝利近7場聯賽僅得1勝，佢哋上場作客中岸水手半場落後3球，最終奮力追成3:3平手執番分，士氣大振。最值得開心嘅係王牌射手貝利沙重拾射門鞋，經過12月初嘅入球荒後，呢位阿爾巴尼亞射手近4場聯賽省4球，有望協助勝利重現恐怖火力。

不過勝利防守都有唔少問題，近10場聯賽只得1場零失波，嗰場仲係對住「零鋒力」嘅紐卡素噴射機，今仗中場布洛斯咸或繼續客串踢中堅，想唔失波都幾難囉。
獅吼桑蘇拿辛奴博表現

獅吼前鋒占美麥卡倫要踢U23亞洲盃唔出得，好在哥斯達黎加射手桑蘇拿辛奴會頂佢個位，級數絕對不庸置疑，呢位啱啱喺重傷噩夢康復嘅前鋒，近期狀態逐漸提升，上場首度擔正表現活躍，入波只係時間問題，更何況上場傷出嘅西班牙中場哥朗拿傷勢無礙，今場落場為眾前鋒提供彈藥，入波應難唔倒佢哋。