新特蘭有迪科爾食糊大盤熱爆

猪拉多纳

「黑貓」新特蘭似乎真係有9條命，最近佢哋又成功復活，今年兩場聯賽全勝共轟入7球，其中老牌射手迪科爾獨取5球，腳風順到冇朋友。佢今仗作客舊東家熱刺，面對哈利卡尼，兩代英格蘭射手鬥射術，認真有睇頭，首選入球大。

（now621周六晚8時45分直播）

新特蘭上年10月搵艾拿戴斯執教救亡，經一輪調整後逐漸有起色，踏入2016年踢咗3場，除足總盃輸畀阿仙奴外，兩場聯賽都贏波，33歲前鋒迪科爾上仗更大演帽子戲法，反勝史雲斯4比2，佢近兩場聯賽入咗5球，狀態弗到震。呢位「大佬」咁勇，有助提升隊友信心及士氣，為「黑貓」注下強心針。值得一提迪科爾過往曾3度效力熱刺，喺呢支倫敦球會度過近10年時間，對對方虛實瞭若指掌，今仗應該搵到食。
熱刺靠哈利仔食胡

至於熱刺整體人腳質素較高，但近期惡戰連場，已連續兩場聯賽失分。不過，前鋒哈利卡尼仍然勇猛，上仗鬥李斯特城冇士哥只因運氣唔夠，呢位22歲射手今季英超已有11球進帳，有力問鼎神射手。由於新特蘭實力相對較弱，預料熱刺會踢得更進取，力爭重敲勝鼓，哈利卡尼應有大把表演機會，最好揀入球大。