撞正錘仔幫當旺紐卡素隨時被扑濕

猪拉多纳

今場「喜鵲」紐卡素主場對「錘仔幫」韋斯咸一戰，「喜鵲」新兵「佛地魔」舒維爾有望處子登場，不過「錘仔幫」近態大勇連贏4場，「錘仔美斯」皮耶傷愈復出後弗到漏，「佛地魔」都要企埋一邊呀，今場平手盤撐韋斯咸！

（now 623周六晚11時直播）

舒維爾日前以1,200萬鎊由史雲斯加盟紐卡素，呢位23歲中場外形似足《哈特波特》頭號奸角「佛地魔」。不過，韋斯咸其實唔使驚「佛地魔」，因為佢哋有「錘仔美斯」皮耶！呢位法國進攻中場傷愈後「錘仔幫」3戰全勝，上仗作客般尼茅夫雖然喺開波初段就失波，但皮耶貢獻1入球1助攻，助「錘仔幫」最終贏3比1，賽後更被網民大讚拍得住美斯，應該攞到金球獎添！
韋斯咸勝在有皮耶

英媒都認為皮耶係今季英超最佳收購，韋斯咸舊年夏天將佢由馬賽帶過嚟，只係使咗1,070萬鎊，論性價比更勝「佛地魔」！睇番數據，「錘仔幫」今季有佢在陣嘅14場波贏咗8場同入咗28球。今場有佢喺度，一於捧韋斯咸平手盤喇！紐卡素上場逼和曼聯3比3全係紅魔前鋒太敗家，「喜鵲」防線一向都勁曳，主場出擊一樣唔樂觀！