維拉谷底反彈 鬥狐狸頂到半場

猪拉多纳

包尾嘅阿士東維拉上仗谷低反彈，終止連續19場聯賽不勝頹勢，主場1比0擊敗水晶宮，今晚食住個勢主場出戰近期攻力減弱嘅「狐狸」李斯特城，有望至少頂到半場，加上「狐狸」已經連續6場開出半場和，可以再追！

（now 621周日凌晨1時30分直播）

維拉自開咧戰擊敗般尼茅夫後，跟住19場英超就輸14場和5場，個勢頹到冇朋友。擊敗水晶宮前一場，維拉喺英足盃第3圈作客打和韋甘比，有維拉球迷目睹坐喺後備度嘅尼史葛同巴特古辛態度輕佻，不理球隊死活顧住傾偈同玩，仲過分到亂吐香口膠，嬲爆嘅球迷上前鬧爆佢兩個，最尾要隊長米卡李察士介入先平息件事。可能受到呢件事激發，尼史葛下一場對住水晶宮竟然發威入波，助維拉終止頹勢，今場主場對2哥李斯特城，唔係冇得砌。
李城孖寶齊齊啞火

李斯特城一對孖寶占美華迪同馬列斯近期齊齊啞火，已經分別有6場同5場波冇士哥，上場擊敗熱刺有僥倖成分，熱刺有多次入波機會都未能把握，結果「狐狸」靠中堅賀夫臨完場前頂入致勝士哥。今場係「狐狸」3連客最後一站，球隊一周內連踢3場作客，體力消耗甚大，今場面對稍有起色嘅維拉，預計上半場拉鋸居多，捧半場和最啱數。