羅馬借新帥效應發維

猪拉多纳

今輪意甲好戲連場，其中羅馬主場對維羅納最值得留意，羅馬早前炒咗魯迪加西亞，聘請史巴列堤回巢領軍。呢位光頭名帥曾率領羅馬兩捧意大利盃，聲望甚高，加上熟悉球隊運作，相信可迅速協助羅馬重回正軌。史巴列堤今晚首戰遇上包尾魚腩維羅納，正好趁機爭取大勝，打響頭炮，直取讓球主勝。

（TVB301周日晚10時直播）
史巴列堤撥亂反正

事實上羅馬人腳唔錯，比真歷、迪羅斯、穆罕默德沙拿同迪斯高等都係優質球員，只係魯迪加西亞唔識用人。史帥曾於05至09年教過羅馬，同托迪、迪羅斯等「大佬」關係良好，相信佢嘅回歸可重新團結球隊。只要呢班猛將踢番應有水準，羅馬仍然具備爭標級數，阿King睇好羅馬「新帥效應」之下，可以發揮出潛能。

對手維羅納今季踢咗19場聯賽竟然仲未贏過，成為唯一未開齋球隊，實力有幾差可想而知。佢哋近兩仗作客鬥名牌球隊拿玻里同祖雲達斯都係吞三蛋，預料今仗亦難逃大敗。
祖記半場搞掂烏甸

另一場祖雲達斯豪取聯賽9連勝，勒都勒唔住，作客烏甸尼斯勝算甚高，如嫌客W賠率乏味，可博半場客勝。尾場AC米蘭主場對費倫天拿，AC教練米赫洛域帥位危危乎，甚至已失去球員支持，恐怕佢一日在位，球隊表現都難反彈，冇本錢讓波下自然捧對家費倫天拿讓球客勝。

（TVB301周一凌晨3時45分直播）