加利佬變盃賽專家捧華倫

猪拉多纳

今晚西班牙盃8強首回合賽事，頭場係華倫西亞主場迎戰拉斯彭馬斯，「蝙蝠軍團」主帥加利尼維利堪稱盃賽專家，西甲未開齋，但對上3場西盃皆淨勝對手2球或以上，今場對住防守力弱嘅拉斯彭馬斯，華倫讓半一，上盤要捧呀！

（周五凌晨3時開賽）

「加利佬」上年12月初接手華倫西亞，聯賽至今仲未開齋，不過盃賽除咗領軍首戰喺歐聯不敵里昂之外，其餘3場西班牙盃全勝，包括16強兩回合加埋大炒CF格蘭納達7比0。其實喺聯賽榜排緊第11嘅「蝙蝠軍團」要爭入前4真係難過登天，同第4位嘅維拉利爾相差成16分，真係專心爭盃賽好過喇！華倫前鋒尼格度近兩仗主場共入4球，包括上場離門50碼轟入世界波，狀態大勇，今場面對近5場有4場皆失2球或以上、更有後衞比加斯及安祖盧比斯等傷兵嘅拉斯彭馬斯，又係時候開餐喇喂！
西維爾留力歎「細」界

另一場西班牙盃8強由西維爾主場對米蘭迪斯，乙組仔米蘭迪斯先後淘汰西甲嘅馬拉加同拉科魯尼亞，今場或者又有驚喜，西維爾料會為周日聯賽大戰馬德里體育會一仗留力，今場小勝格，捧細盤。

（周五凌晨4時開賽）

最後講埋法足盃32強賽事，聖伊天主場鬥阿些斯奧，聖伊天有前鋒羅拔比歷、中場夏蒙馬等多名傷兵，阿些斯奧亦有中場基斯度夫雲遜同門將施利比續抖，今場作客或會穩陣行先，捧半場和。

（周五凌晨4時開賽）