拜仁再炮製漢堡

猪拉多纳

近2次對壘喪派13隻光蛋

抖咗超過1個月，德甲今個星期重燃戰火，今晚由班霸拜仁慕尼黑打頭陣，作客另一老牌球會漢堡。雖然兩者喺德甲球壇地位崇高，但近年漢堡對住拜仁毫無招架之力，不時被對方大數離場。撞啱拜仁呢次急需用勝仗，證明佢哋冇受主帥哥迪奧拿季尾辭職一事所影響，就算拜仁呢鋪讓到兩球，2.3倍「讓客」照捧可也。

（now671、有線61及201周六凌晨3:30直播）

雖然講拎德甲錦標次數，漢堡遠遠比唔上拜仁咁多，不過呢班波一樣有項威水紀錄，就係德甲創立以嚟，唯一一支從未降過班嘅球隊。漢堡今季表現亦有所好轉，擺脫近年長期喺護級區域打滾嘅命運。
佐羅統領防線難靠

之但係佢哋面對拜仁始終都係改變唔到腳軟問題，近10次交手有7次至少被對方大數3球或以上，最近2次仲誇張，夾埋喪吞13隻光蛋，完全唔見得有還手能力。更何況漢堡喺早前熱身賽3戰全敗，仲要每仗至少失2粒，咪話唔得人驚。加上中場基迪安祖恩、中堅史柏希斯打柴，今仗由過去喺阿仙奴甩漏多多嘅守將佐羅統領後防，叫人點放心得落吖。

對於拜仁嚟講，呢個冬天最大新聞係主帥哥迪奧拿確認季尾離隊，好在件事發生咗成個月，相信班球員都消化好。主席路明尼加賽前表明拜仁會繼續全力支持哥帥，隊長拿姆亦開腔希望成為三冠王嚟歡送呢位西班牙教練，但有乜嘢比球隊實實在在打場勝仗嚟得有說服力？相信拜仁班高層今次會落柯打，務求盡力砌冧漢堡。
梅拿食漢堡食上癮

事實上，拜仁喺歇冬期冇偷懶，為咗操起狀態連FIFA金球獎頒獎禮都冇去。雖然右閘拿菲爾賽前受傷，不過老將拿姆足以填補缺口。而且翼鋒列貝利、馬里奧葛斯、洛賓已經復操，今仗雖然未落得場，但隊友京士利高文、杜格拉斯哥斯達肯定感到壓力，呢鋪實要交功課保住正選位置，加上中場湯馬士梅拿呢排食漢堡食上癮，連續2次交鋒都射入對方2球，咁仲邊使驚拜仁今仗會骾親先？