祖記強勢屠狼

猪拉多纳

聯賽10連勝衝榜首

今晚意甲重頭戲，祖雲達斯主場對「雌狼」羅馬，祖記已累積聯賽10連勝，上仗周中意盃又過關，打入4強，表現勢如破竹，對重奪榜首志在必得。羅馬早前請史巴列堤回巢執教，但上仗竟然被包尾大幡維羅納逼和，睇怕隊波仲有排執，今仗受讓半一都冇着數，撐祖雲達斯上盤。

（TVB301周一凌晨3時45分直播）

祖雲達斯開季首6仗聯賽僅1勝，一度被睇死衞冕無望，但「老婦人」始終根基深厚，整體人腳屬於意甲首屈一指，因此，自上年11月重拾水準，已連贏10場聯賽，可以話係現時歐洲主要聯賽之中，表現最佳嘅球隊之一，難怪吸引車路士管理層注意，想撬走祖記教練阿里基。祖雲達斯現只落後榜首拿玻里兩分，若然阿里基真係可以助祖記從後趕上捧盃，必然身價十倍，到時肯定大把豪門高薪請佢領軍，為人為己都要搏命。事實上，以祖記目前嘅巔峰狀態，相信喺意甲難逢敵手。
史巴列堤回巢有排執

羅馬月中炒咗教練魯迪加西亞，搵番史巴列堤執教，點知首仗主場對住包尾嘅維羅納都贏唔到，可見呢支首都球隊積弱已久，並非短期內可以改善，最不幸係羅馬過去5次作客祖雲達斯全敗而回，每次最少失3球，加上羅馬現時處於低潮，大敗都唔奇。