墨爾本城主勝攞「威」

猪拉多纳

澳職今日有精彩戲碼上演，由「好睇兼好食」嘅墨爾本城主場出擊，迎戰狀態唔多掂嘅威靈頓鳳凰。墨爾本城由哈利洛維奴、科拿路利及阿倫穆爾組成嘅鐵三角，入球能力相當驚人，1.43倍主勝值得睇好。

（有線64及203周一下午4:30直播）

墨爾本城去年底開始上力，近9場聯賽只係輸過1場，烏拉圭射手科拿路利仲拎埋澳職12月最佳球員添！科拿路利依家狀態巔峰，近8場聯賽射入7球咁多，佢同哈利洛維奴同阿倫穆爾，今季為墨爾本城炮製25個「士哥」，加上主場出擊特別醒神，佢哋近4場主場賽事射入咗12球，梗係畀到人信心啦。

鳳凰近6場聯賽只得2和4負劣績，4場輸波都係作客賽事，其中有3場被對手攻入3球，證明呢隊波唔識作客，即使有路爾斯芬頓、文尼梅斯卡特復出都冇用，今場唔輸就奇喇。