紅魔陪你「數綿羊」

猪拉多纳

英格蘭足總盃第4圈開打，今夜先由英冠仔打比郡主場迎戰曼聯，紅魔領隊尹戈爾又大難不死，雖然有得留隊，但曼聯今場點都要打番場爭氣波，若然繼續悶爆踢法、繼續險勝只會引嚟「魔迷」更大反對聲音，難得「綿羊」打比郡近排防守能力急降，曼聯今場料會採取主動，全力盡數博反彈，入球大捧得過！

（周六凌晨3時55分開賽）
尹戈爾博盃賽翻身

曼聯喺贏完利物浦後，上場聯賽對修咸頓又打回原形，主場輸0比1；尹戈爾備受下台壓力，難得今場對手只係英冠分子，的確係尹帥續命及曼聯翻身嘅大好機會。再加上英足盃可以話係紅魔鬼最有機會爭冠嘅比賽，畢竟英超冠軍機會渺茫，爭奪強隊林立嘅歐霸盃難度亦甚高，所以曼聯今場可以話冇得留力，預料朗尼、安東尼馬迪爾、安達靴里拉等主力會正選披甲，全力搶攻爭勝。

不過紅魔條防線天殘地缺，正選左右閘艾舒利楊格同達美安有排抖；馬高斯盧祖、菲爾鍾斯、勞基梳爾繼續養傷，防中舒韋恩史迪加同卡域克亦上陣成疑，尹戈爾今場焗住要派麥尼亞、古利姆華利拿等小將上陣，似乎有多少牙煙。紅魔近5場作客有4場至少失2球，今場睇怕都係入得多同時又失得多。
打比郡有入波本錢

打比郡最近大跌Watt，近6場僅得1勝，包括近2仗分別不敵伯明翰0比3同般尼1比4；呢隊波上半季防守唔差，但嚟到下半季即刻走晒樣。睇番打比郡嘅人腳，喺英冠眾隊之中都算係超班，戴倫賓特、湯馬士恩斯、佐治科奧尼等均具備英超比賽經驗，今場隨時為曼聯防線製造唔少麻煩，大盤唔怕追！