FC山東收柯打炒起莫亨巴根

猪拉多纳

亞冠盃第二圈外圍賽，中超球隊FC山東（山東魯能），主場迎戰印度球隊莫亨巴根。FC山東近年推行「森巴化」，繼上年簽入巴西國腳射手迪亞高泰達利之後，今年更聘請前巴西國家隊主帥文奴文尼斯執教，會方亦已定下目標，一定要打入亞冠盃16強。文奴文尼斯首場正式賽事，當然要做齣好戲盡數對手。

（周二下午3時開賽）

FC山東過去10年6次參加亞冠盃都無法取得小組出線權，球會管理層近期進行改革，包括搵來名宿李霄鵬擔任副總經理，並請到文奴文尼斯執教。現年53歲嘅文奴文尼斯曾於2010至2012年執教巴西國家隊，雖然成績麻麻，但以佢嘅級數，去中超搵食仍綽綽有餘。加上FC山東有唔少巴西外援，文帥同佢哋同聲同氣，有利管理球隊。
莫軍當黑失行李兼逼巴士

莫亨巴根實力差過FC山東一大截之外，中場主將格倫今仗更無緣出戰。而且球隊仲「非常黑仔」，抵達中國後發現唔見兩袋行李，加上手續出現問題，唔可以由青島機場坐高鐵去濟南嘅酒店，要改坐大巴；可見莫亨巴根準備工夫實在不敢恭維，未知比賽時又會唔會出現其他差錯呢？