山東讓主炒爆莫亨巴根

猪拉多纳

印度兵造訪濟南變雪條

唔使諗，亞冠盃資格賽山東魯能（足智彩譯FC山東）主場對印度甲冠軍莫亨巴根呢啲波，就算讓到2球，都要玩1.55倍「讓球主勝」，事關中超水準遠高過印度之餘，今場波仲要响濟南踢，當地氣溫最高只得6度，班印度兵變梗雪條，點同山東撼呀？

（開賽時間：周二下午3:00）

中超群雄呢幾年直情當啲人仔係廁紙咁，大疊大疊係咁燒，不斷高價買啲歐美當打球員，山東自然唔例外，早排佢哋買嗰件巴西國腳中堅基爾拿斯文圖，據講身價就成千萬歐元咁滯，比起禾夫斯堡嘅前拜仁主將丹迪，幾乎貴成倍有多，如果正面啲去睇，可以讚嘆內地球會豪氣錢多，假如由負面去諗，可以笑係錢多人傻。
莫亨巴根主力箭頭冇隨軍

姑勿論山東係咪買貴咗，但係以佢哋個豪華陣容，有心嘅話要炒起莫亨巴根完全冇難度，因為印度甲嘅水準高唔過港超好多，即使莫亨巴根係當地冠軍，畀盡佢高傑志、東方、南華半班好未，睇吓山東早排友賽贏東方同南華嘅表現，就知莫亨巴根絕對唔係山東嗰皮，何況佢哋4個外援入面，嗰件千里達主力箭頭格倫冇隨軍作客濟南，今次主要靠日援游佐克美、海地鋒將諾迪策動攻勢，根本好難同山東抗衡。

當然，山東今場未必會出盡所有貴價外援，但係單以現役、過氣中國國腳王大雷、楊旭、蒿俊閔、王永珀甚至張文釗嘅質素，都完全足夠打爆莫亨巴根，況且阿根廷兵禾達蒙迪路、巴西前鋒迪亞高泰達利極可能落場玩吓，莫亨巴根實力不如人兼遠赴寒區作戰，真係唔死一身潺。