狐狸攻城大有睇頭

猪拉多纳

英超榜首大戰，曼城主場挑機榜首嘅「狐狸」李斯特城，兩軍首循環交手打和0比0，不過今場係「藍月亮」主場喎，呢隊波主場出戰特別生猛，近8主場贏咗7場，7場都開入球大，依家落後對方3分今場更要全力搶攻爭勝。但李斯特城都唔嘢小，進攻組織又快又流暢，上場鬥利物浦踢到成隊巴塞隆拿咁，神射手占美華迪亦弗爆。各位觀眾，今晚「雙城記」等睇入球騷，捧1.59倍入球大啦！

（now 621周六晚8時45分直播）
華Dee馬列斯愈踢愈有

曼城同李斯特城，前者錢多到使唔晒，陣容星光熠熠，齋計今場預計正選合共身價，包括3,800萬鎊嘅阿古路、4,900萬鎊嘅史達寧及2,850萬鎊嘅奧達文迪等，11個人加埋總身價至少值2.3億鎊；後者只係小小球會，11位預計正選合共身價佔曼城嘅1成都冇，兩大主力占美華迪同馬列斯加盟時身價分別係100萬鎊同150萬鎊，但佢兩個至今合共取得31個聯賽入球，其中「華dee」打破入球荒後愈踢愈有，上場鬥紅軍更一人包辦兩球，當中包括一記離門30碼嘅窩利金球，睇到球迷嘩嘩聲呀！

小球會「狐狸」就係憑住呢股打不死精神，個個球員跑多幾步，防守上向對手施加壓迫迅速攞番控球權；進攻上就不斷走位，踢快速小組One-two撞牆，上場正正係靠呢樣嘢玩殘紅軍防線，難怪網民都話「狐狸」嘅攻勢踢到成隊巴塞咁！曼城防守不嬲都唔強，35歲中堅迪米捷利斯更係後防炸彈，今場隨時又爆過！
曼城主場入球停不了

曼城防守曳就惟有以攻代守，呢隊波主場旺開大，踢咗12場英超主場賽事，有10場總入球數係3球或以上，12場共入咗33球，平均1場入2.75球，非常誇張。

王牌射手阿古路繼續狀態大勇，除咗英足盃對阿士東維拉冇獲派上陣外， 近4場佢有落場嘅賽事，場場都有士哥，一共入咗6球，再配合大衞施華、史達寧等進攻球員，「藍月亮」嘅攻力確係得人驚。咪諗咁多，今場一於熱捧入球大！