巴塞往績老利炒硬蝙蝠仔

猪拉多纳

年廿九晚西甲早場，弗到爆燈嘅巴塞隆拿作客包尾大幡利雲特，唔單止實力相差10條街，巴塞亦專蝦呢隻「小蝙蝠」，近5次交手均至少贏3球，連「大蝙蝠」華倫西亞啱啱都要吞7蛋，加上巴塞球王美斯只要入多兩球，便成為西甲史上首位轟入300球嘅球員，要將呢隻「小蝙蝠」煎皮拆骨毫無難度，就算讓球主客和要讓二球，照揀巴塞讓球客勝。

（now 632周日晚7時直播）
美斯爭做首位西甲300+射手

上月巴塞豪取8勝1和，包括上周末喺聯賽榜首大戰反勝馬體會2比1，追平球隊2009年年度最佳開局，估唔到日前西盃4強首回合對住實力唔曳嘅「大蝙蝠」華倫西亞，竟然狂數7比0，蘇亞雷斯更食出大四喜，非常恐怖。另一邊廂，包尾嘅利雲特近9仗輸咗7場，最慘係「小蝙蝠」近年遇親巴塞都腳仔軟，之前5次碰頭全敗，合計狂失23球，每仗均輸3球或以上，雖然利雲特要搶分護級，但「地上最強」依家勇達巔峰，球王美斯只差兩球，便成為西甲史上首位轟入300球嘅球員，必定搶韁屠殺「小蝙蝠」，讓球客勝咪錯過。