祖記半場勝博得過

猪拉多纳

備戰歐聯 速戰速決

祖雲達斯將於下周中出戰歐聯，率先今晚踢意甲作客鬥博洛尼亞。祖記聯賽豪取15連勝，包括上仗擊敗拿玻里兼搶走對方榜首位置，狀態及士氣都處於巔峰。為免夜長夢多，影響備戰歐聯鬥拜仁慕尼黑，相信祖記今仗會先下手為強，盡快入波奠定勝局，Mic少捧半場客勝。

（TVB 301周六凌晨3時45分直播）

祖雲達斯近年喺意甲戰績超班，雖然季初一度失準，但解決問題後愈戰愈勇，自去年11月開始至今，15場聯賽全勝，其中近6次意甲作客有5場上半場已經領先。其他球隊遇上呢支班霸，唔好話想爆冷搶分，甚至連半場都頂唔住。雖然祖記下周中歐聯16強首回合，先於主場迎戰拜仁慕尼黑，難免有後顧之憂，而球隊難得重奪榜首，絕對唔想將一哥之位再拱手讓人，所以今仗應該唔會留力。反而球隊會力爭盡快打開紀錄，控制比賽節奏，咁先至可以保持體力。
博洛尼亞近5對戰全敗

事實上，祖記後備人腳質素亦佳，上仗就係靠後備上陣嘅施蒙尼沙薩入波，主場以1比0擊敗拿玻里，就算今仗祖記排出輪換陣容，都一樣夠殺。更何況博洛尼亞只屬於陪跑分子，近5仗主場僅1勝2和2負，更不堪係博洛尼亞近5次對祖雲達斯全部輸晒，睇怕今仗半場都招架唔住對手強攻，一於捧祖記半場客勝。