阿仙奴半場和夠侯

猪拉多纳

英格蘭足總盃嚟到16強階段，今晚早場上演2014年決賽翻版戰，由衞冕嘅阿仙奴主場鬥英冠「一哥」侯城，當年兩軍喺法定時間打和2比2，「兵工廠」加時贏3比2捧盃。「兵工廠」實力當然較高，又有往績支持正路秤先啲，不過佢哋下周中要喺歐聯16強硬撼巴塞隆拿，今場可能勒住踢，球隊近6仗主場4次開出半場和，一於再追！

（周六晚8時45分開賽）

「兵工廠」阿仙奴上周英超激鬥榜首李斯特城，喺落後情況下將士用命，補時階段靠久休復出嘅韋碧克絕殺，反勝對手2比1，保持英超爭標希望。「兵工廠」依家3線作戰，除咗力爭聯賽冠軍，仲有歐聯同英足盃，論重要性當然前兩者緊要啲。

阿仙奴喺英足盃一路抽到好籤，先後擊敗新特蘭同般尼晉級，今仗16強對手亦只不過係英冠級數嘅侯城，預料領隊雲格會繼續派遣部分副選出戰，好似19歲新星艾禾比、新兵艾利尼、今季並非常規正選嘅阿歷士張伯倫、祖爾甘保等都有望正選上陣，畀一班主力好似阿歷斯山齊士、奧斯爾及艾朗藍斯等大將抖吓，全力應付下場歐聯16強首回合惡鬥「地上最強」巴塞。
防守硬淨 侯城縮後「泊大巴」

再睇埋「兵工廠」近6仗主場賽事，冇一場係喺上半場領先，當中有4仗開出半場和，包括上兩圈英足盃對般尼同新特蘭。「老虎」侯城依家排喺英冠榜首，靠嘅就係穩健防守，近8場有6場係零失球，而近5場亦有4場開出半場和，呢4場嘅半場都係同對手打成0比0，今場嚟到酋長球場，「老虎」唔敢也文也武，料會縮後嚟踢玩「泊大巴」，初段要悶和阿仙奴班二線兵，難度唔算大，相信戰況會逞膠着，半場和值得一博。