拜仁強鋒「客」窒祖記

猪拉多纳

進攻球員個個弗爆

歐聯16強首回合今晚好戲連場，除咗英超西甲對壘，仲有意甲德甲「王者對決」！祖雲達斯主場迎戰拜仁慕尼黑，雙方防線都有多名主力因傷缺陣，但相比之下，拜仁整體人腳同實力稍勝一籌，而且近年對賽亦剋住祖雲達斯，近3次對賽全勝，當中2次作客都贏2球或以上，明顯係格食格，今仗一於推介拜仁慕尼黑2.25倍「客Win」！

（有線62及202周三凌晨3:45直播）

兩大勁旅今場防線都傷兵滿營，拜仁有謝路美保定、畢斯杜巴、查維馬天尼斯同貝拿迪亞養緊傷，祖雲達斯亦失去主力防守球員基亞連尼、馬田卡沙利斯同阿歷士辛度。但事實上，拜仁眾守將缺陣已經有一段時間，教練哥迪奧拿早就搵到克服方法，小將甘美治同新加盟嘅泰斯治都有實力，防守問題唔算太大。
文迪蘇傑無緣倒戈

相反，祖雲達斯形勢就相當不妙，除咗防線缺乏有卡士嘅大將頂上之外，曾經踢過拜仁慕尼黑嘅中鋒文迪蘇傑亦未擺脫傷患，今場冇得倒戈，呢位克羅地亞國腳喺分組賽入3球，係祖記今屆歐聯首席射手，佢唔出得對祖雲達斯鋒力影響都咪話唔大。
馬里奧葛斯任後備

祖雲達斯上周末聯賽作客僅悶和博洛尼亞，拜仁則反勝達斯泰特，拜仁前線羅拔利雲度夫斯基同湯馬士梅拿正處於巔峰狀態，中場堤亞高艾簡達拿、洛賓及京士利高文亦有適當休息，列貝利更成功復出，連養傷多時嘅後備殺手馬里奧葛斯亦復任後備，入球板斧夠晒多，面對前後場兵力削弱、一向「食慣」嘅祖雲達斯，有力反客為主先下一城。