「狐狸」拉西細畀你睇

猪拉多纳

今個周中英超開快車，今晚率先上演5場，最矚目係一哥李斯特城主場對西布朗，好多人都睇死「狐狸」捱唔到尾，因為兵源遠遜豪門球隊，而且其縮後打反擊呢招已被睇穿，尤其係主場面對玩死守嘅護級分子，總係老鼠拉龜冇碇埋手，加上近6仗主場5度開細，對住擅守嘅西布朗唔慌多波入，再追細盤。

（now 621周三凌晨3時45分直播）
反防對鐵桶陣少交收

李斯特城上仗完場前1分鐘靠後備入替嘅荷西烏路亞絕殺，幾經辛苦先贏諾域治1比0，過程驚險。事實上，「狐狸」爭標最大障礙，就係兵源太薄弱，打嚟打去都係嗰十幾人，後備質素又麻麻，短時間內接連征戰體力消耗極大，如上年聖誕、新年快車期間，「狐狸」都試過連續3仗交白卷，1月中因應付英足盃而在10日內踢4仗，結果有3仗總入球都唔超過2球。

而且李斯特城主帥雲尼亞里最擅長縮後打反擊，前線利用高速快嘅馬列斯同占美華迪，殺對手措手不及，但呢招已畀其他球隊睇穿，特別係護級球隊造訪「狐狸」，一定以其人之道、還治其人之身玩死守，令「李城」好難有機會打反擊，上仗對住諾域治陷於苦戰有辦你睇，難怪近6仗主場出擊僅3勝，並且全部開入球細喇。

另一邊廂，西布朗喺「護級專家」佩尼斯帶領下，梗係防守大過天，當年佢執教史篤城同水晶宮都係靠呢招護級成功，特別係作客場合必穩陣行先，近5仗作客有4場開入球細，「李城」要攻佢哋嘅鐵桶陣絕非易事，轉捧入球細更佳。