博薩斯索羅低水得「米」

猪拉多纳

肥叔縱橫菠菜界數十載，有乜嘢筍盤、鬼盤未見過吖？是日重心推介場次，係意甲薩斯索羅主場對AC米蘭，AC連續12場正式比賽未輸過，原本作客要讓平半尚算正路，但水位有逾2倍咁高，對近況弗爆嘅「紅黑兵團」嚟講，似乎筍得滯，肥叔唔信有咁大隻蛤乸隨街跳，一於捧番薩斯索羅下盤。

（周日晚10時開賽）
論近況A米冇得彈

AC米蘭近況的確冇得彈，連盃賽在內近12仗未輸過，仲贏咗當中8仗，話佢哋係依家意甲最弗球隊當之無愧，因此今仗作客薩斯索羅要讓平半算係合理。不過肥叔再睇清楚個盤，發現AC有2.06倍咁高水，明顯熱唔透，相反薩斯索羅被質到得番1.79倍咁低，唔多尋常喎，莊家似乎對「紅黑兵團」唔夠信心。

查實薩斯索羅近況唔曳，近4仗保持不敗，止住早前嘅頹勢，睇番佢哋之前兩次主場對AC錄得全勝，喺自己地頭出擊有格食格味道，肥叔向來睇盤做人，唔理名牌球隊定二線兵，總之個盤好路就得，薩斯索羅咁低水擺明有計，呢個下盤咪錯過。