銀河頭炮「華」麗轉身

猪拉多纳

A高迪莊來投星味爆燈

新一季美職開鑼，呢個球星「養老院」繼續吸引猛將登陸，最矚目始終係洛杉磯銀河，呢支西岸豪門今季簽入前英格蘭國腳艾殊利高爾，以及荷蘭「殺人王」尼祖迪莊，配合兩位前利物浦球星謝拉特與羅比堅尼，星味更加濃烈。洛杉磯銀河首仗主場迎戰華盛頓聯隊，有力打響頭炮，直取讓球主勝。

（TVB302周一早上11時直播）

銀河一直奉行「星戰策略」，由以往碧咸、當路雲，到之後羅比堅尼、謝拉特，依家引入艾殊利高爾（A高）、尼祖迪莊，的確令人期待。雖然話A高已經35歲，呢位左後衞畢竟喺歐洲頂級聯賽打滾多年，為阿仙奴、車路士立下唔少功勞，應付美職仍綽綽有餘。至於31歲嘅尼祖迪莊仍然當打，以攔截勇悍見稱，有佢負責中場掃蕩，謝拉特可以專注組織攻勢，令球隊攻守能力更平衡。
華盛頓聯作客例腳軟

另一邊廂，上季常規賽排東岸第4位嘅華盛頓聯隊，近年表現都係平平無奇，而且作客成績非常差，上季常規賽17仗作客僅得4勝3和10負，佢哋近7次作客銀河，更錄得2和5負劣績。最大鑊係上季主力前鋒龐迪斯已離隊，會方冇簽入具級數球星，更加難以同銀河抗衡，輸兩球或以上好正路。