獅吼勝利豁出去玩大佢

猪拉多纳

澳職常規賽進入大直路，無論爭標或爭季後賽資格，形勢都非常緊湊。今日布里斯班獅吼主場對墨爾本勝利，雙方各有所求，獅吼正全力追趕榜首阿德萊德聯，而勝利為保前6位置，參加季後賽，亦不容有失。預料兩隊都豁出去搶攻，可望上演入球騷，捧大盤。

（有線64、203台周六下午4時30直播）

澳職常規賽剩番5輪比賽，前4位球隊積分咬得好緊，獅吼更加同西悉尼流浪者同分。由於賽事所餘無幾，稍有不慎失分，爭標立即會陷入被動。獅吼最大爭標本錢就係攻力強大，當中22歲新進射手占美麥卡倫大熟大勇，今季已有14球進帳，包括上仗梅開二度，幫助球隊以3比2力挫西悉尼流浪者，為衝擊冠軍寶座，打下一支強心針，今仗當然要繼續利用進攻優勢，壓倒對手。
主隊防線弱失波多

不過獅吼防守麻麻，近8場聯賽合共失咗22球，換言之平均每場失近3球，當中以3比6輸畀珀斯光輝最誇張，估計今場難以保持清白之身。

另一邊廂，排第5位嘅墨爾本勝利只係領先第7位FC悉尼3分，參加季後賽資格仍然未穩。墨爾本勝利同樣有1位出色射手助陣，就是30歲嘅貝利沙，佢今季聯賽已轟入15球，包括1月對獅吼，射入1球，協助墨爾本勝利大勝4比0。兩位超級射手今仗火併，入波數字唔會少。