|
跑埋呢期賽事，郭爾達就走人，其實佢3月頭至續約到季尾，唔夠一陣就執包袱，唔知係思鄉，定係一如之前韋健仕嘅case咁，冇乜優質坐騎搞到冇癮，與其喺度hea，不如撇，返去美利堅，話唔定又畀佢撞到隻「裝備齊全」，戇居居贏個世界冠軍呢！
暫時嚟講，老郭手上有5W4P，成績好就唔係好，但又未至於好差，總好過客串初期，有時連上陣機會都冇吖。不過，唔只係佢，好多過江龍嚟到都係遇到相同境況，韋達及柏寶經已擸了一大批兵源，而大馬房如告東尼，又有蔡仔做主帥一職咁滯，再數落去阿摩有阿民，之後德叔及潘頓瓜分一啲，仲有一班有磅減嘅華將及見習生，試問尋常人點可能打破缺口，所以，呢類例子只會重複又重複咁出現。吖，講笑咁講，除非那批客串騎師有磅減，或許有番多少賣點！
講番郭爾達，今日出馬3隻啫，有冇送行馬真係唔敢講，因為牌面普普通通，之但係P未必冇囉，好似第六場「信賴」咁，啱啱先至上名，咁啱就係田草1400米，呢次基本條件同上賽冇咩分別，排檔仲好咗，隻馬又唔係唔耐拼，隔夜十倍八倍，臨場亦唔慌熱得去邊，1W3P玩吓無妨。
銀影激光1800仲啱
至於第九場「銀影激光」，上場明顯在跑法上過於主動，返嚟輸唔遠已收貨，印證到集中跑長途係正確方向，呢次縮短二百米跑1800米可能仲啱，撼唔撼得贏「馬主精英」唔敢講，處理得好唔排除有P。
亨利 | 
金睛卡
发表于 2010-3-21 08:01
变色卡
显身卡