李城兵疲哥本哈根受讓筍

猪拉多纳

英超冠軍李斯特城今季再寫「歐聯童話」，呢支「新丁」喺G組賽事連贏2仗排榜首，不過今晚佢哋主場迎戰丹麥冠軍哥本哈根未必咁易食，事關「狐狸」兵力不足以應付聯賽同歐聯，近期英超成績亦不斷下滑，球員身心俱疲下表現必受影響，讓球客勝值得支持。

（有線64及203台周三凌晨2時45分直播）
兼顧聯賽唔敢去盡

李斯特城目前雖以2戰得6分暫列榜首，但佢哋太依賴占美華迪同馬列斯，板櫈深度不足，要兼顧英超、歐聯2條戰線非常吃力，李斯特城上仗聯賽慘敗畀車路士，體力同士氣都大為消耗，匆匆再戰相信未及回氣，而且英超連續3場不勝後，球隊未敢將精力全部投放喺歐聯，演出必打折扣。

哥本哈根今屆歐聯由外圍賽第2圈開始征戰，至今踢咗8仗比賽拎到4勝4和，其中4仗作客1勝3和，表現硬淨，而且哥本哈根今屆歐聯8仗從未試過單場比賽失多過1球，李斯特城王牌射手占美華迪狀態一般，而且獨力難支，破關難度大大增加。