皇馬強勢起塞

猪拉多纳

國家打吡魯營開Show

全球矚目嘅西甲「國家打吡」今晚上演，由巴塞隆拿主場鬥皇家馬德里！「銀河艦隊」皇馬今季各項賽事仍然保持不敗，全隊狀態處於巔峰。相比之下巴塞陷入低潮，讓唔起「不敗艦隊」，皇馬讓球客勝有2倍認真值博！

（Now 632周六晚11時15分直播）

兩隊周中西班牙盃同樣派副選比賽，巴塞僅能逼和丙組仔靴高斯，而皇馬則大勝晉級，反映雙方目前處境。上季西甲盟主巴塞隆拿今季水準極唔穩定，近兩場聯賽都和波，搞到現時畀皇馬甩開6分，今仗話就話大好機會拉近距離。不過以巴塞現時景況，恐怕唔容易達標，皆因昔日聞風膽喪嘅「MSN」鋒線死晒火，蘇亞雷斯除咗對馬拉加一役停賽外，近5仗只入1球，尼馬更連續7仗食白果，單靠美斯獨力支撐場面。呢位阿根廷球王身體情況麻麻，早前又傳佢又出現嘔吐問題，睇嚟真係捱得好辛苦。
後防大執位 巴塞勢危

巴塞隊長恩尼斯達今仗有望復出領軍，但「小白」養傷多時狀態成疑，左閘佐迪艾巴有傷在身，或要用盧卡斯迪治尼代替，右閘沙治羅拔圖未必踢得，防線要大執位，教練安歷基可能被迫用中堅馬斯真蘭奴串演右閘，令本身已經唔多穩陣嘅後防更加危危乎。

皇馬雖然亦有加里夫巴利、艾華路莫拉達及卻奧斯因傷倦勤，好彩Ｃ朗已重拾射門鞋，近2場西甲喪轟5粒，包括打吡戰對馬體會食出「大三元」，再顯救世主本色。值得一提係Ｃ朗出道以來，球會級入波數字已達499球，換言之今場只要有士哥，就可以達到500球大關，以佢咁鍾意出風頭嘅性格，肯定渴望喺營魯球場創下里程碑。
Ｃ朗訪福地 零舍醒神

事實上皇馬近9次作客巴塞，Ｃ朗8次有波入，總共有10球進帳，包括上季射入反勝1球，證明佢去到魯營呢塊「福地」特別醒神，加上皇馬今季各項賽事合共21場比賽仍然不敗，兼聯賽6連勝走勢，讓球客勝有2倍分頭的確抵玩。
近年經典對碰

2/5/2009（皇馬2:6巴塞）：巴塞喺呢場冠軍前哨戰控制大局，沙維上演助攻帽子戲法，協助巴塞大炒6比2，成為49年來國家打吡單場最大比數賽果，提前鎖定聯賽錦標，並於之後締造前無古人嘅6冠王霸業。

30/11/2010〈巴塞5:0皇馬〉：巴塞憑新加盟射手韋拿梅開二度，喺主場豪贈死敵5蛋，令首度領軍出戰國家打吡皇馬「寸王」莫連奴冇晒面，巴塞守將碧基賽後更舉起5隻手指示威。

22/4/2012〈巴塞1:2皇馬）：皇馬帶住領先優勢造訪魯營，王牌C朗下半場單刀破網助「銀河艦隊」贏2比1，成為皇馬重奪失落3季嘅聯賽冠軍關鍵，幾日後巴塞於歐聯4強出局，功勳教頭哥迪奧拿宣布辭職。

3/4/2016〈巴塞1:2皇馬〉：法國球王施丹中途接手皇馬後首場國家打吡，佢果斷地起用名不經傳嘅防中卡斯米路，成功減低「MSN」威力，最終靠賓施馬及C朗嘅入波反勝2比1，施丹成功樹立軍威。