皇馬華倫大騷Encore

猪拉多纳

近6次交手炮製25個士哥

西甲今晚進行補賽，由華倫西亞主場迎戰皇家馬德里。作客嘅皇馬目前爭標形勢大好，踢少巴塞隆拿兩場下仍領先1分，「BBC」復合後為進一步鞏固優勢，今仗對華倫西亞必定全力搶攻。主隊華倫西亞要護級亦唔會坐以待斃，兩軍歷來交鋒多演入球騷，今仗捧中位數3.5球大盤！

（Now 632周四凌晨1時45分直播）
「蝙蝠」搶分護級搏殺格

皇家馬德里上場聯賽喺主場2比0輕取愛斯賓奴後，爭標形勢依然大好，如今首要任務就係將少踢嘅兩場聯賽轉化為分數。「銀河艦隊」兵力強勁，主力陸續傷愈復出後已幾近夫添，威爾斯翼鋒加里夫巴利上仗強勢回歸即刻入波，令教練施丹上仗可以大膽輪換，畀賓施馬、莫迪歷同基羅拿華斯等主力休戰，叉足電為今仗補賽候命。

皇馬「BBC」組合賓施馬、加里夫巴利及C朗拿度再次重出江湖，已經係入球保證，加上艾華路莫拉達同艾斯高等屢有斬獲，球隊火力相當驚人。事實上，皇馬過去6次同華倫西亞交鋒一共產生25個入球，當中有5次總入球係3球或以上，兩隊嘅進攻踢法往往帶嚟大量士哥。

華倫西亞雖然自知技不如人，但球隊目前護級形勢緊湊，上仗贏波後仍然排喺尾6位置，主場出擊亦要伺機搶分。「蝙蝠兵團」季初主場迎戰另一勁旅巴塞隆拿，就曾力戰下以2比3僅敗，證明佢哋喺主場出擊，同頂尖球隊都有一拚之力，今仗再開入球騷機會頗高，入球大值捧！